Axı siz ölməmisiz, hər gün onun hesabına yeyib-içən futbol veteranları?!

29 Dekabr 2020 21:00 Köşə 1 695
Axı siz ölməmisiz, hər gün onun hesabına yeyib-içən futbol veteranları?!

Dünya çempionatın finalında Maradonaya qarşı mübarizə aparan, veteran futbolçularımızın mənəvi atası, gülməli ittihamla həbs olunan dəyərli azərbaycanlı haqda danışacam.

Gənclər arasında dünya çempionatının gümüş medalını qazanmış iki azərbaycanlıdan biri (digəri İqor Ponomaryovdur) Vladimir Mixalevski 20 gündür İspaniyadan Rusiyaya ekstradisiya edilib.

Bakıda doğulan müdafiəçi "Neftçi"nin heyətində 185 oyunda 5 qol vurub.

Onu çalışdığı "Dinamo" cəmiyyətində 21.4 milyon rublu mənimsədiyi ittihamı ilə həbs ediblər.

Mixalevski kifayət qədər zəngin adamdır. Məhz bu səbəbdən 21.4 milyon rubla görə həbs edilməsi ciddi şübhələr yaradır. Böyük ehtimalla, həbsin əsl səbəbi 21.4 milyon deyil. Ən azı ona görə ki o, bu məbləği dərhal ödəyə bilər.

Həbsindən öncə ötən ilin noyabrında 60 illik yubileyi olan veteranı AFFA həmişəki kimi "ənənəs"inə sadiq qalaraq unutmuşdu. Bu təşkilatın rəhbərlərinin azadlıqdakı veteranlara və ümumiyyətlə futbolumuza münasibətini bildiyimizdən, həbsdə olan birinə dəstək verəcəklərini gözləmirik. Amma...

Veteranlar yaxşı bilir ki, Mixalevski azərbaycanlı futbolçuların dayağı olub. Azərbaycan futbolunun yetirmələri onun hesabına özünə Moskvada, Bakıda, başqa yerlərdə iş-güc, şərait qurub, ailə üzvləri, yaxınları üçün onunla münasibətlərdən bacardıqları qədər istifadə, bəlkə də sui-istifadə ediblər.

İndi məntiqi sual yaranır: haradadır o veteran futbolçular?

Rəhmətlik Sergey Kramararenko sağ olsa, bir saniyə də susmazdı!

Axı siz ölməmisiz, hər gün Mixalevskinin hesabına Moskvada yeyib-içən futbol veteranları?!

Gülməli ittihamla həbs edilən Mixalevski Azərbaycan futbolunun yetirmələrinə bu məbləğdən dəfələrlə çox pul xərcləyib. Mixalevski Maşallah Əhmədov həbs olunanda da, ona açıq-aşkar dəstək verən tək-tük veteranlardan idi.

Mixalevskini əminliklə Azərbaycanın futbol veteranlarının mənəvi atası, ən azı böyük qardaşı adlandırmaq olar. Bəs onlar bugünəcən Mixalevskinin azadlığa çıxması üçün nə edib?!

Oqtay Abdullayevin məsələ ilə bağlı ona zəng edən jurnalistə "Rusiya Prokurorluğuna müraciət etməyi fikirləşirik" açıqlamasından başqa bu haqda heç nə eşitməmişəm...

Mixalevskinin Rysiyaya ekstradisiyasının videosuna, o vəziyyətdə danışdırılmasına baxıb, çox üzüldüm...

Dünya çempionatının finalında Maradonaya qarşı oynamış, veteran futbolçularımız üçün ürəyini verməyə hazır, müsahibələrində hər dəfə "Mən azərbaycanlı olmağımla fəxr edirəm" deyən Vladimir İvanoviçi bu vəziyyətdə görmək ürəkağrıdıcıdır.

Allah bütün günahsız insaların qapısını açsın!

Anar Şabanoğlu

Xəbər Lenti