Bu gün Azərbaycan Premyer Liqasında 4-cü turun bir matçı keçiriləcək.
Günün tək qarşılaşması "Baksel Arena"da baş tutacaq. Burada son çempion "Neftçi" son ölkə kubokunun qalibi "Keşlə"ni qonaq edəcək.
Mövsümə uğursuz start verən, ardıcıl 3 turu da məğlubiyyətlə başa vuran qonaqların kapitanı Tərlan Quliyev son çempionla oyun öncəsi Sportinfo.az-a danışıb:
"3 oyun uduzmağımızdan asılı olmayaraq meydana qələbə üçün çıxmaq lazımdır. Amma kollektiv şəkildə qələbəni fikirləşmək lazımdır.
5 nəfər qələbəni, 5 nəfər başqa şeyi fikirləşirsə, qələbə qazanmaq çətin məsələdir. Belə yanaşma ilə "Neftçi" kimi komandaya qarşı hətta böyük hesabla məğlub olacayıq".
Təcrübəli futbolçu ən azından 1 xal qazanmaq üçün meydana çıxacaqlarını bildirib: "Fikrimiz qələbə qazanmaqdır. Ən azından xal qazanmaq istəyirik.
Amma ciddi itkilərimizin olmasını da unutmayaq. Şəhriyar Əliyev və Abanqın olmamağı oyunumuza təsir edəcək".
"Neftçi" - "Keşlə" görüşü bu gün 18:30-da start götürəcək.