“Aston Villa”nın baş məşqçisi Unay Emeri komandanın İngiltərə çempionatının turnir cədvəlində ilk dördlükdəki mövqeyini şərh edib.
Sportinfo.az xəbər verir ki, ispaniyalı mütəxəssis diqqətlərini “Arsenal”la matça yönəltdiklərini bildirib:
“30 və ya 32-ci tura qədər gözləyə bilərik. Həmin vaxt ilk dördlüyə düşsək, o zaman həmin yerə layiq olduğumuza əmin ola bilərik.
Biz indi xoşbəxt və diqqətli olmalıyıq. Çərşənbə günü oyun arxada qaldı və biz o anı “Villa Park”da azarkeşlərimizlə keçirdik
(“Aston Villa” “Mançester Siti”yə 1:0 hesabı ilə qalib gəlib). Lakin indi diqqətimizi növbəti matça yönəltməliyik”.
“Aston Villa” 15 turdan sonra 32 xalla üçüncü pillədə qərarlaşıb. Komanda növbəti turda “Arsenal”la qarşılaşacaq.
