Azərbaycan I Liqasında XXIII turun görüşləri keçirilib.
"Şamaxı" doğma meydanda "Difai"ni qəbul edib.
Premyer Liqaya vəsiqə iddiasını sürdürən ev sahiblərinin məqsədi çempionatda qalmaq olan rəqiblə qarşılaşması kifayət qədər gərgin alınıb.
Hər iki tərəf hesabı birinci açmağa çalışıb. Qapılar önündə yaradılan qol epizodları bir-birini əvəz edib.
Qonaqların qapıçısı Əlirza Müştəbəzadə üç epizodda əla seyvlə yadda qalıb. «Neftçi»nin qapıçısının inanılmaz qurtarışları «Difai»ni ruhlandırıb.
Emil Quluzadənin uzaq məsafədən endirdiyi zərbəni Əkbər Vəliyev güclə zərərsizləşdirib. Kristian Kamtanın fərqlənməsinə son anda müdafiəçilər mane olub.
Hesab 34-cü dəqiqədə açılıb. «Turan Tovuz»un qış fasiləsində «Difai»nin sərəncamına vermək istədiyi, lakin «Şamaxı»ya qismət olan Səbayıl Bağırov kornerdən havalandırılan topu başla tora qovuşdurub.
Fasilədən az keçmiş stadionda canlanma yaranıb. Bu an rayonun icra başçısı Tahir Məmmədov VİP-lojadakı yerini tutub.
O, ətrafındakı şəxslər və 700 nəfərdən artıq azarkeşlə bərabər komandanı dəstəkləyib. Bundan vəcdə gələn şamaxılılar daha bir qol vurub.
Üç ay öncə «Karvan»dan gəlmiş Bəhruz Teymurov müdafiəçilər arasında anlaşılmazlıqdan yararlanıb və axıradək mübarizə aparmağın sayəsində tribunaları ayağa qaldırıb.
Lakin bu da son olmayıb. «Difai»nin kamerunlu hücumçusu Kristian Kamta cərimə meydançasından önündən qapıya baxımlı qol vurub.
Gözlənilməz gedişat ev sahiblərində narahatlıq yaradıb, müdafiə xəttində səhvlər artıb. Belə epizodların birində «fədailər» rəqibi azlıqda yaxalayıb.
Lakin Tahir Zeynalovun səhv qərarı hesabın bərabərləşməsinə əngəl olub. O, cərimə meydançasına daxil olmadan ötürmə verib.
Halbuki bir qədər irəliləsəydi, qapı önündə dayanmış iki komanda yoldaşı boş qapını nişan almağa çətinlik çəkməyəcəkdi.
«Difai» axır 15-20 dəqiqədə daha fəal təsir bağışlayıb. «Şamaxı» isə əksinə: bir-birinin ardınca özlərini yerə sərərək, vaxt aparıblar. Və istəklərinə çatıblar.
Xallarını 45-ə yüksəldən "Şamaxı" turnir cədvəlinin 3-cü pilləsində qərarlaşıb. 17 xalı olan "Difai" isə 9-cu yerdə qalıb.
SPORTİNFO.AZ
Şamaxı şəhər stadionu. 700 tamaşaçı |
|
|
|