“Elxan Məmmədovla rayonumuza son səfəri zamanı konkret söhbətimiz olmadı”.
Bu sözləri "Sportinfo TV"nin "Youtube" layihəsi - "Futbol söhbəti"nin növbəti buraxılışına qonaq olan "Zaqatala"nın prezidenti Musa Qurbanov deyib.
AFFA-nın icraçı vitse-prezidenti Elxan Məmmədov regionlara səfər çərçivəsində noyabrın 16-da Zaqatalaya gedib.
Zaqatala Olimpiya İdman Kompleksinin stadionunda aşağı yaş qruplarından ibarət komandaların üzvləri ilə görüş keçirilib. Uşaqlara AFFA tərəfindən idman geyimləri və toplar hədiyyə olunub.
Tədbirin sonunda AFFA-nın icraçı vitse-prezidenti Elxan Məmmədovun və Zaqatalanın eyniadlı klubunun prezidenti Musa Qurbanovun iştirakı ilə uşaqlarla oyun keçirilib.
Tanınmış telejurnalist Elçin Cəfərovun təqdimatında yayımlanan verilişdə iştirak edən I Divizion klubunun rəhbəri E.Məmmədovun ona nə söylədiyini açıqlayıb:
“Mənə dedi ki, gələn mövsümdən Premyer Liqada komanda sayını artırmaq istəyirik. O, ad çəkmədi, sadəcə, iştirakçı sayını 10-a çatdırmağı planlaşdırdıqlarını söylədi.
Elxan Məmmədov onu da qeyd etdi ki, hər şey maliyyə vəziyyətindən asılı olacaq. Mən də bildirdim ki, “Zaqatala” şərait və infrastruktur olaraq Premyer Liqada mübarizə aparmağa hazırdır”.
