«Zirə» yorğundur. İki istiqamətdə mübarizə, onsuz da, heyət sarıdan davamlı problem yaşayan komandanı o ki var gücdən salıb.
Daha güc bölüşdürməsindən söhbət gedə bilməz - bıçaq sümüyə dirənib, yalnız son güc sərfindən danışmaq mümkündür.
Belə bir vaxtda Qubaya getmək də varsa… İlin 10 ayı yağışın içində üzən, palçığa dönən o stadionda futbol oynamaq cəhənnəm əzabıdır.
«Zirə» kimi hər rəqibə uyğun model seçən komanda praqmatik tərzi əzbərləmiş «İmişli»dən 1 xal almaqla kifayətlənirsə…
Deməli, risk almadılar.
Yaddan çıxarmayaq: onların ilk iki dövrədəki qarşılaşmalarında da qalib gələn olmayıb. Birincidə 1:1, ikincidə 0:0 hesabı qeydə alınıb.
«Zirə» artıq Premyer Liqada dördüncü yeri gözdən çıxarıb. «Neftçi»nin onlardan bir addım öndə olmasıyla daxilən barışıblar.
Bir şey olmaz, qabaqdan kubokun finalı gəlir.
Mayın 13-də keçiriləcək matçda «Sabah»a qalib gəlsələr, liqadakı 4-cü pillənin avrokubok yolunda heç bir önəmi qalmayacaq.
Qazanacaqları kubok «Zirə»ni birbaşa Avropa Liqasına aparacaq. Çempionatdakı sıra itkisinin ikiqat sığortası buradan keçir.
MUSA
