«Səbail»in yeni baş məşqçisi AFFA tərəfindən seçiləcək.
Federasiya rəhbərliyi bu məsələ ilə məşğul olmağı texniki direktor Cahangir Həsənzadəyə həvalə edib.
Bu da təsadüfi deyil. «Caqa» kimi tanınan funksioner AFFA-da yüksək vəzifədə çalışmaqla bərabər, Bayıl klubunun İdarə Heyətində yer alır.
Namizədlərin müəyyənləşdirilməsi və konkret danışıqların aparılması ona tapşırılıb.
Mayın 13-də 1 illik yeni müqaviləyə imza atan Aftandil Hacıyevin postundan uzaqlaşdırılması da Həsənzadənin məsləhəti ilə reallaşıb.
Hacıyevə antipatiya bəsləməsini zaman-zaman nümayiş etdirmiş «Caqa» dəfələrlə klubun baş sponsoruna - “Azərbaycan Xəzər Dəniz Gəmiçiliyi” Qapalı Səhmdar Cəmiyyətinin (ASCO) rəhbərliyinə onunla bağlı mənfi fikirlər söyləyib.
«Sumqayıt»la keçirilən Premyer Liqanın son matçı isə Həsənzadənin əlinə böyük bəhanə verib.
O, səfərdə qeydə alınan 0:5 hesablı məğlubiyyətdən Hacıyevin əleyhinə istifadə edib və ASCO rəhbərliyini inandırıb ki, adıçəkilən şəxs postunda qalarsa, gələn sezonda da uğurlu nəticə qeydə alınmayacaq.
SPORTİNFO.AZ
