“Sabah”ın Velko Simiçi “Sivasspor”dan heyətinə qatmasından xəbərdarsız.

Serbiyalı vinger Azərbaycana Valdas Dambrauskasın israrı ilə gəlib.

”Bayquşlar”ın yeni baş məşqçisi onunla şəxsən tanışdır. Belə ki, balkanlı sol cinah oyunçusu «Omoniya»da onun rəhbərliyi altında çıxış edib.

Litvalı çalışdırıcı Nikosiya təmsilçisində yaxşı münasibət qurduğu Simiçlə, demə, 2 aydan çoxdur əlaqə saxlayırmış. ”

Red Star”ın yetirməsi Premyer Liqamıza gəlməyə öncə tərəddüdlə yanaşıb, Türkiyədə bəzi klublarla danışıqlar aparıb.

Super Liqanın ortabab iştirakçılarından birinə keçidi alınmayınca, I Liqaya getmək istəməyib və üzünü Azərbaycana çevirib.

“Sabah” serbiyalı legionerin maaşını tam verməyəcək. Belə ki, birilik icarə müqaviləsinə əsasən, 30 yaşlı vingerin maaşının 50 faizi onun müqavilə ilə məxsus olduğu “Sivasspor” tərəfindən ödəniləcək.

Simiç “Sivasspor”da illik təxminən 150 min dollar maaş alırdı. Serbiya yığmasının da üzvü olmuş hücumameyilli yarımmüdafiəçi ötən mövsüm Türkiyə Super Liqasında 15 oyun keçirib, 1 qol vurub.

O, “Sabah”da 21 nömrəli formada çıxış edəcək.

Simiç karyerası ərzində “Sivasspor”la yanaşı, Serbiyanın “Srvena Zvezda” (2012-2013, 2018-2021), “Zemun” (2018), “Voyvodina” (2021-2023), İsveçrənin “Bazel” (2013-2017), “Şaffhauzen” (2016), “Kyasso” (2016-2017), “Vintertur” (2017), Sloveniyanın “Domjale” (2014-2015) və Kiprin “Omoniya” (2023-2025) klublarında çıxış edib.

Velko Serbiyanın müxtəlif yaş qruplarından ibarət yığmalarının üzvü olub. 2023-cü ildə əsas milliyə çağırılıb və 1 qol vurub.

SPORTİNFO.AZ