.jpg)
Azərbaycan Premyer Liqasının 8-ci turunda “Qarabağ” sürpriz şəkildə “Səbail”ə məğlub oldu – 1:3.
“ASCO Arena”dakı bu yenilgi sayəsində ağdamlıların cari mövsümdə 9-u avrokuboklarda, 7-si ölkə çempionatında olmaqla 16 oyunluq məğlubiyyətsiz oyunlar seriyasına son qoyuldu.
Qurban Qurbanovun yetirmələri rəsmi görüşlərdə sonuncu dəfə 2020-21 mövsümünün 28-ci turunda, başqa cür desək, 5 ay əvvəl, mayın 19-da “Neftçi”yə boyun əymişdi.
“Köhlən atlar” cari mövsümdə nəinki uduzmamışdı, hətta qapısından 1-dən artıq top buraxmamışdı.
“Qarabağ”ı sonuncu dəfə oyuna 3 dəfə mərkəzdən başlamağa “Sivasspor” məcbur etmişdi. Bu, ötən ilin noyabrına təsadüf etmişdi.
11 ay əvvəl Avroliqanın qrup mərhələsinin dördüncü turu çərçivəsində İstanbulda baş tutan qarşılaşmada Türkiyə təmsilçisi 3:2 hesabı ilə qələbə qazanmışdı.
Ölkə çempionatında ağdamlıların qapısına 3 top vurulan oyun isə nə az, nə çox, düz 3 il əvvələ təsadüf edir.
2018-19 mövsümünün 9-cu turunda “Neftçi” əzəli rəqibini məhz indiki hesabla – 3:1 məğlub etmişdi. Bu, həmin ilin oktyabrın 28-də baş vermişdi.
Bir sözlə, “Səbail” qazandığı qələbə ilə “köhlən atlar”ın bütün uğurlu sindromlarını qırmağı bacardı.
HƏBİB / Sportinfo.az
