.jpg)
“Qarabağ” və “Neftçi” Birləşmiş Ərəb Əmirliklərinin “Əl-Əyn” klubuna transferi baş tutmayan Bəhlul Mustafazadəni heyətinə qatmaq istəyir.
“Sabah”la müqaviləsinə xitam verildiyi üçün azad agent statusu daşıyan millinin müdafiəçi hazırda hər iki tərəflə danışıaqlar aparır.
Mustafazadə “Sabah”dan “Əl-Əyn”ə transfer olunsa da, BƏƏ təmsilçisi onun keçidindən son anda imtina edib. Bu səbəbdən Masazır təmsilçisi FİFA-ya şikayət ərizəsi göndərməyi planlaşdırır.
Axı “Sabah” Mustafazadənin ərəb klubu ilə 3 illik anlaşması üçün onunla müqaviləni ləğv edib. Halbuki Bəhlulla sözləşməsi gələn ilin yayında bitəcəkdi.
Düzdür, 24 yaşlı oyunçunun transfer vərəqi hələ də “Sabah”dadır, amma klubun onunla yenidən anlaşması çətin görünür. Çünki “Sabah” problemə FİFA-nın aydınlıq gətirəcəyi vaxtadək gözləmək məcburiyyətindədir.
Müştərilərə gəlincə, “Qarabağ” Bəhlulu heyətinə qatmağa “Neftçi”dən daha yaxındır.
Doğrudur, bakılılar daha yaxşı maliyyə şərtləri təklif edir, buna baxmayaraq, yığma üzvü “köhlən atlılar”ın şərəfini qorumağa daha çox can atır.
Bu keçidin qarşıdakı günlərdə, daha dəqiq desək, iyulun 29-da “Aşdod”la keçiriləcək Konfrans Liqasının II təsnifat mərhələsinin cavab matçından sonra açıqlanması gözlənilir.
SPORTİNFO.AZ
.jpg)
