“Bəli, razıyam, daxildə hədsiz çox adam var idi.
Hər ağızdan bir söz çıxırdı və onun arxasında gedirdilər“.
Bu fikirlər “Bakı“nın sabiq baş məşqçisi Bojidar Bandoviçə məxsusdur. 2013-2014-cü illərdə paytaxt klubunu çalışdırmış monteneqrolu mütəxəssis Sportinfo.az-a açıqlama verib.
O, klubun müflis olub dağılmasının səbəbi kimi rəhbərliyin yanlış siyasət yürütməsindən danışıb. Hafiz Məmmədovun güvəndiyi insanların “Bakı”nı çökdürməsinə dair iddialara münasibət bildirən balkanlı çalışdırıcı deyib:
“Adla danışmağı xoşlamıram. Azərbaycanda çalışdığım 10 ay müddətində fikirlərimiz üst-üstə düşməsə də, yola gedirdik, əl sıxırdıq.
Beş futbolçu alırsansa, hamsının əla oynaması mümkün deyil. Mütləq arada 1-2-si ümidləri doğrultmayacaq.
Bu, hər yerdə belədir. Digər tərəfdən, sən komandaya səviyyəli, adlı-sanlı futbolçu gətirirsənsə, klubdakı işlər, klubun siyasəti həmin səviyyəyə cavab verməlidir. Təşkilatçılıq, peşəkarlıq, dəqiqlik – hər şey“.
