.jpg)
Bu, «Qarabağ»la «Zirə» arasında 28-ci duel idi.
«Zirə» startını 2015-ci ildən götürən qarşılaşmaların heç birində rəqibinə qalib gəlməyib. Maraqlıdır, deyilmi?
Səbəbini deyim, bilin.
«Zirə»də «Qarabağ» xofu var, bunu anadangəlmə instink də adlandırmaq mümkündür.
Baş məşqçinin kimliyindən asılı olmayaraq, «Zirə»də həmişə fikirləşiblər ki, yox e, «Qarabağ» başqa dünyanın təmsilçisidir, onlarla ayaqlaşa, məğlub edə bilmərik.
Bu fikir o qədər kök salıb, o qədər rişə atıb ki, düzü, inanmıram ki, «Zirə» illər sonra da «Qarabağ»a qalib gəlsin. Sindrom uzun illər davam edəcək kimi görünür.
Demirəm ki, «Qarabağ»ı udmağı arzulamırlar. Arzulamağına arzulayırlar, fəqət, bunu meydanda həyata keçirəcəklərinə gümanları yoxdur.
Axmaq o kəsdir ki, «Zirə»ni «Qarabağ»ın «kiçik qardaş»ı adlandırır.
Böyük və kiçik qardaşlar arasında 7:1 olmur, əfəndilər! Halbuki «Qarabağ» bundan əvvəl də «Zirə»yə iki dəfə 6 qol vurub.
«Zirə» büdcəsini azından iki dəfə artırsa, 5-10 min dollarlıq legionerlərdən əl çəksə, hə, onda «Qarabağ»fobiyadan qurtula bilərlər.
Özgə cür mümkün deyil bu qorxunu içindən çıxarması, azad olması.
MUSA
