"Kəpəz" Premyer Liqanın 31-ci turunda sürpriz nəticə ilə yadda qaldı.

Bölgə klubu səfərdə çempion "Sabah"ı məğlub etdi - 1:0.

Matçın qəhrəmanı birmənalı olaraq Yusif İmanov oldu deyə bilərik.

Millimizin sabiq üzvü bir neçə vacib seyv edərək qələbədə önəmli rol aldı.

O, qarşılaşmadan sonra Sportinfo.az müsahibəsində meydanda yaşananlara toxunub.

- Çempion üzərində qələbəni necə bacardınız?

- Vacib qələbə oldu. Əziyyətimizin bəhrəsini gördük. Görüşə psixoloji və fiziki olaraq çox yaxşı hazırlaşmışdıq. Sonda şükürlər olsun ki, istəyimizə çatdıq. Yerimizi qorumaq üçün bu qələbə çox lazım idi.

- Ötən dəfə də "Sabah"a 0:1 məğlub olsanız belə meydanda ən yaxşılardan idin. Sabiq komandana qarşı meydana xüsusi motivasiya ilə çıxırsan?

- Vallah mənim üçün fərq etmir. Mən olanları çoxdan unutmuşam. Düzdü, hər oyuna eyni hazırlaşırıq. Sadəcə böyük oyunlarda motivasiya istər-istəməz daha yüksək olur.

- Bu mövsüm son çempion "Qarabağ"ı iki dəfə məğlub etmisiniz. Bu dəfə də eyni aqibəti hazırkı çempion "Sabah"a yaşatdınız. Yaxşı oynamağınız üçün mütləq rəqiblər çempionmu olmalıdır?

- Açığı, özümüzə də maraqlı gəlir (gülür). Uşaqlarla öz aramızda da bu barədə danışırıq. Böyük komandalara qarşı çox yaxşı oynayırıq.

- Təsadüfi adlandırmaq olar?

- Məncə, belə demək doğru olmaz. Əziyyətimizin nəticəsi olduğunu düşünürəm.

- Mövsümün sonuna cəmi 2 tur qalır. Karyeranla bağlı qərar vermisən?

- Bu barədə menecerim daha yaxşı bilir. Hazırda "Kəpəz"dəyəm. Bu kluba hörmətim sonsuzdur. Çətin vəziyyətdə mənə dəstək oldular. İlk danışacağımız klub da "Kəpəz" olacaq.

XANOĞLAN İMANOV