“Barselona”nın hücumçusu Lamin Yamalın zədədən bərpa prosesi gözləniləndən daha yaxşı gedir.
Sportinfoaz “The Touchline”-a istinadən xəbər verir ki, ispaniyalı futbolçu bərpa planına tam uyğun şəkildə çalışır və məşqləri heç vaxt buraxmır.
Bildirilir ki, 18 yaşlı oyunçunun tam hazır vəziyyətə gəlməsi üçün ilkin olaraq DÇ-2026-nın qrup mərhələsinin üçüncü turu nəzərdə tutulsa da, indi onun starta qədər sıraya dönmə ehtimalı var.
Yamal apreldə “Selta” ilə oyunda (1:0) zədə almışdı. O, bu mövsüm 45 matçda iştirak edib, 24 qol vurub və 18 məhsuldar ötürmə verib.
İspaniya millisi dünya çempionatında H qrupunda Kabo-Verde, Səudiyyə Ərəbistanı və Urugvay yığmaları ilə mübarizə aparacaq.
11 iyun-19 iyul tarixlərini əhatə edəcək mundial ABŞ, Kanada və Meksika olmaqla üç ölkədə keçiriləcək. Turnirə 48 komanda qatılacaq.
