"Araz-Naxçıvan" futzal üzrə UEFA Çempionlar Liqasının pley-off mərhələsinə vəsiqə qazanıb.
Naxçıvan təmsilçisi yer aldığı 7-ci qrupdakı son matçında Niderland çempionu "Tigers Roermond"u 3:2 hesabı ilə məğlub edib.
Beləliklə, 7 xal toplayan Azərbaycan çempionu qrup qalibi kimi növbəti mərhələyə adlayıb.
Yevgeni Kukseviçin baş məşqçisi olduğu komanda ilk oyunda yarışın təşkilatçısı olan Rumıniyada yerli "Yunayted Qalati"ni məğlub edib - 2:1.
Komanda daha sonra Lüksemburq çempionu "Differdanje 03" ilə heç-heçə edib - 2:2.
"Neftçi"nin sabiq idman direktoru, vaxtilə futzal üzrə millinin də şərəfini qorumuş Ceyhun Sultanov Rumıniyaya səfərdə "Araz-Naxçıvan"ı tək buraxmayıb.
O, bu barədə Sportinfo.az-a açıqlama verib:
"Möhtəşəm sonluq oldu. Xüsusən son rəqib çox çətin komanda idi.
"Tigers Roermond" heç-heçə etsəydi, qrupdan onlar çıxacaqdı. "Araz-Naxçıvan" xarakter göstərdi, lazım olan nəticəni əldə etdi.
Komandamızın keçirdiyi oyunlar xoşuma gəldi. Qrupda birinci yer tutmağımız bu mənada mənə qətiyyən təəccüblü görünmədi.
Burada yaxşı futzalçılar çoxdur. "Araz-Naxçıvan"ın növbəti mərhələdə də adından söz etdirəcəyinə inanıram".
