VI İslam Həmrəyliyi Oyunlarında iştirak edəcək Azərbaycan futzal millisinin səfərinin detalları müəyyənləşib.
Sportinfo.az xəbər verir ki, bu barədə "report"a Futzal Federasiyasının mətbuat katibi Mahal Məmmədov məlumat verib.
O, komandanın noybrın 2-də Səudiyyə Ərəbistanına yola düşəcəyini söyləyib:
"Komanda VI İslam Həmrəyliyi Oyunlarına hazırlıq məqsədilə oktyabrın 16-dan 19-dək Bakıda toplanış keçib. Yekunda isə "Araz-Naxçıvan"ın legionerləri ilə yoxlama oyununda qüvvəsini sınayıb.
Milli noyabrın 2-də Bakıdan Ər-Riyada yola düşəcək.
Bir neçə futzalçı, baş məşqçi və məşqçi "Araz-Naxçıvan"ın UEFA Çempionlar Liqasında keçirəcəyi matçlardan sonra Rumıniyadan birbaşa Səudiyyə Ərəbistanına gedəcək. Heyətin qalan hissəsi isə Azərbaycandan Ər-Riyada uçacaq".
Azərbaycan millisi VI İslam Həmrəyliyi Oyunlarında A qrupunda Liviya, Özbəkistan və Səudiyyə Ərəbistanı ilə mübarizə aparacaq.
