Azərbaycan klubları avrokubokların 2026/27 mövsümündə 14-cü qələbəsini qazanıb.
Sportinfo.az PFL-in saytına istinadən xəbər verir ki, bu, UEFA Çempionlar Liqasının Liqa mərhələsinin 2-ci turuna təsadüf edib.
“Sabah” öz meydanında Çexiya “Slaviya”sına 2 cavabsız qolla qalib gəlib.
Bu, Azərbaycan təmsilçilərinin cari mövsümdə ümumilikdə 14-cü avrokubok qələbəsi olub. Bununla da ölkəmiz tarixinin yeni rekorduna imza atıb.
Bunadək ən yüksək göstərici 13-ə bərabər idi. 2023/24 mövsümündə komandalarımız ümumilikdə 13 dəfə qələbəyə sevinmişdi.
Cari mövsümdə “Sabah” 7, “Qarabağ” 4, “Zirə” 2, “Neftçi” 1 dəfə meydandan qalib ayrılıb.
Bu qələbə UEFA reytinqinə də təsir edib. Azərbaycanın cari mövsümdəki əmsalı 5,625-ə, son 5 mövsümün nəticələrinə görə hesablanan reytinq xalları isə 24,187-yə yüksəlib.
Bu, 24,125 xala malik İsraili keçmək üçün yetərli olub. Bir pillə irəliləyən Azərbaycan hazırda UEFA reytinqində 24-cü sırada qərarlaşıb.
