“Hədəfimiz 3 xaldır. Güclü rəqib, çox yaxşı komanda olduğunu bilirik”.
Sportinfo.az xəbər verir ki, bunu “Qarabağ”ın qambiyalı hücumçusu Zakaria Savo deyib.
– Zədədən sonrakı bərpa dövrünüz necə keçdi?
– Bərpam çox yaxşı keçdi. Tibbi şöbəmiz üzərimdə çox yaxşı işlədi, çox əziyyət çəkdi. Şadam ki, zədədən bərpa olunaraq, yaşıl meydanlara qayıtdım.
– Zədəli vaxtınızda “Qarabağ”ın avrokubokların əsas mərhələsindən kənarda qaldı. Özünüz formada olsaydınız, sizcə, bu, baş verərdimi?
– Belə demək olmaz. Çünki nəticə yalnız məndən asılı deyil. Komandada 25-30 futbolçu var. Futbol – kollektiv idman növüdür. Konfrans Liqasının əsas mərhələsinə vəsiqə qazana bilməməyimizə görə çox pis olduq. İndi bütün fikrimizi çempionluğa yönəltmişik. Hədəfimiz budur.
– Gələn tur “Neftçi” ilə oynayacaqsınız. Gözləntiniz nədir?
– Hədəfimiz 3 xaldır. Güclü rəqib, çox yaxşı komanda olduğunu bilirik. Amma biz də “Qarabağ”ıq. Məqsədimiz qalib gəlməliyik.
– Milli komanda seçimi imkanınız olsaydı, İsveçi, yoxsa Qambiyanı seçərdiniz?
– (gülür – red.) Mən bilmirəm. Anam İsveçdən, atam Qambiyadandır. Hansı ölkədən çağırsalar, mən hazıram.
