Azərbaycan I Liqasında XVII tur başa çatıb.

2024-cü ilə uğurlu start verən "Difai" buə dəfə Şamaxıda "İrəvan"ı qəbul edib.

Qarşılaşma bölgə təmsilçisinin 5:0 hesablı qələbəsi ilə başa çatıb.

İlk dəqiqələrdən hücum futbolu oynayan «fədailər» Tahir Zeynalovla fürsəti qaçırıb.

İlham Allahverdiyev 13-cü dəqiqədə Bayraməli Qurbanova qarşı edilən kobudluğa görə toəyin olunan penaltini qola çevirib. Bundan 10 dəqiqə sonra isə Qurbanov Allahverdiyevin gözəl ötürməsini qola çevirib.

Mövsüm ərzində ən gözəl oyunlarından birini keçirən Elgiz Kərəmlinin komandası fasilədən sonra da həmlələrini davam etdirib. Baş məşqçinin ikinci hissədə şans verdiiyi Kristian Kamta 65-ci dəqiqədə fərqi artırıb.

«Neftçi»nin yetirməsi olan İ.Allahverdiyev isə son 3 dəqiqədə əsl hücumçu keyifiyyətini göstərib və het-trikini rəsmiləşdirib.

Beləcə, xallarını 12-yə yüksəldən Ağsunun təmsilçisi turnir cədvəlinin 9-cu pilləsində qərarlaşıb və son sıradakı "Araz Saatlı"dan daha da uzaqlaşıb. 23 xalı olan "İrəvan" isə 6-cı yerdə qalıb.

I Liqada mövsümün başa çatmasına 11 tur qalıb və indi qazanılan hər xalın əhəmiyyəti böyükdür.

Dövlət Təhlükəsizliyi Xidmətinin (DTX) təşəbbüsü ilə yaradılan "Difai"nin qarşısına qoyulan məqsədə doğru inamla irəlilədiyini deyə bilərik.

Qarabağ müharibəsinin iştirakçıları və qazilərinin klubu qış fasiləsindən sonra çox dəyişib.

Aparılan transfer siyasəti uğurlu alınıb, komandanın maddi-texniki bazası gücləndirilib. Bunlar da nəticələrdə öz əksini tapmağa başlayıb.

SPORTİNFO.AZ