Azərbaycan Silahlı Qüvvələrinin polkovniki Tehran Mənsimov doğma rayonunun futbol klubuna maddi dəstək olub.
Şuşanın azadlığı uğrunda aparılmış döyüşlərin fəal iştirakçısı «Şahdağ»a maliyyə köməkliyi göstərib.
Qusar klubunun prezidenti Samir Xeyirbəyovla münasibətləri yaxın olan T.Mənsimov bir qrup yerli iş adamıyla bərabər, I Liqanın iştirakçısına ianə kampaniyasına qoşulub.
Dörd il öncə “Azərbaycan Bayrağı” ordeninə layiq görülmüş hərbiçi komandaya 10 min manatdan artıq vəsait bağışlayıb.
Tehran Mənsimov 1972-ci il avqustun 24-də Qusar rayonunun Düztahir kəndində anadan olub. 1989-cu ildə orta məktəbi bitirib. 1990-1992-ci illərdə keçmiş sovet ordusu sıralarında qulluq edib.
Daha sonra Azərbaycan Milli Ordusunda xidmətə başlayıb. Könüllü olaraq Birinci Qarabağ müharibəsinə yollanaraq, cəbhənin müxtəlif istiqamətlərində gedən döyüşlərdə fəal iştirak edib. Ardınca Ali Hərbi Məktəbdə təhsil alıb və ona leytenant rütbəsi verilib.
24 avqust 2011-ci ildə Azərbaycan Respublikası Silahlı Qüvvələrinin Hərbi Akademiyasına daxil olub və 26 iyun 2013-cü ildə həmin akademiyanı fərqlənmə ilə bitirib.
Qarabağ bölgəsində taqım komandirliyindən briqada komandirliyinə kimi xidmət yolu keçib.
4 iyul 2013-cü ildən Naxçıvan Əlahiddə Ümumqoşun Ordusunda xidmətə başlayıb və Şahbuz rayonundakı hərbi hissənin komandiri olub.
Polkovnik Tehran Mənsimov 2020-ci il sentyabrın 27-də Azərbaycan Silahlı Qüvvələri tərəfindən Ermənistan işğalı altında olan ərazilərimizin azad edilməsi və Azərbaycanın ərazi bütövlüyünün təmin olunması üçün başlanan 44 günlük Vətən müharibəsində fəal iştirak edib.
O, noyabrın 4-dən 8-nə qədər davam edən Şuşa döyüşlərində şəhərə girən ilk zabitlərdən olub. Bu döyüşlərdə qəhrəmanlıq nümayiş etdirib.
Tehran Mənsimov 2005-ci ildə "İgidliyə görə", 2017-ci ildə "Vətən uğrunda" medalları ilə təltif edilib.
Vətən müharibəsindəki qəhrəmanlığına görə 2020-ci ildə ona ölkə başçısının sərəncamı ilə "Azərbaycan Bayrağı" ordeni verilib. Eyni zamanda o, "Şuşanın azad olunmasına görə" medalı ilə də təltif edilib.
Prezidentin 24 iyun 2021-ci il tarixli sərəncamları ilə Tehran Mənsimova “Füzulinin azad olunmasına görə” və “Xocavəndin azad olunmasına görə” medalları verilib.
SPORTİNFO.AZ
