Kot d ivuarlı Qoba Zakpanı Kipr "Etnikos"undan heyətinə qatan «Səbail» daha bir legioneri rənglərinə bağlayıb.
Bayıl klubundan Sportinfo.az-a daxil olan məlumata görə, Luvaqa Kizito ilə anlaşma əldə olunub.
Bu gün Azərbaycana gələcək Uqanda millisinin vingeri azad agent statusu daşıyır. 28 yaşlı afrikalı indiyədək 5 ölkədə legioner həyatı yaşayıb.
«Bunamvaya»nın yetirməsi 2012-ci ildə Portuqaliyaya yollanıb və burada 5 il qalıb. O, həmin illər ərzində «Leyxes», «Sportinq Kovilha», «Rio Ave», «Feyrense»nin formasını geyinib.
2017-ci ildə Rumıniyadan təklif alan Kizito növbəti 2 mövsümü «Politexnika İaşi»də başa vurub. 2018-ci ildə Belarusda peyda olub, BATE-nin uğurları üçün tər töküb.
1 il sonra Qazaxıstana üz tutub, Karaqanda «Şaxtyor»ın şərəfini qoruyub. Adıçəkilən yarımmüdafiəçinin karyerasının son 3 ili İsraillə bağlıdır.
2019-2020-ci illərdə «Hapoel Kfar-Saba»da çıxış edib. Ötən mövsümü isə «Hapoel Nof-HaGalil»də keçirib.