“Qəbələ” heyətinə daha bir futbolçu qatıb.
Sportinfo.az klubun rəsmi saytına istinadən xəbər verir ki, “qırmızı-qaralar” hücumçu Rodriqo Qattasın keçidini rəsmiləşdirib.
29 yaşlı çilili oyunçu ilə 1,5 illik müqavilə imzalanıb. “Union Espanyola” klubunun yetirməsi olan forvard peşəkar karyerasına bu komandada başlayıb.
2009-2013-cü illərdə adıçəkilən klubun üzvü olan Qattas sonradan ölkəsində “Union La Kalera” (2013-2014), “Kobreloa” (2014-2015), “Kobresal” (2015), “Santyaqo Morninq” (2016), “Reyncers” (2018) və “Santa Kruz”da (2019) çıxış edib.
Legioner həyatında Fələstinin “Hilal Əl-Qüds” (2016-2017), Uruqvayın “Serro” (2017) klublarında oynamış oyunçunun son komandası ötən il şərəfini qoruduğu Kanada təmsilçisi “York9” olub.
O, Çili yığmasının da formasını geyinib. Hücumçu 2009-cu ildə ölkəsinin U-20 milli komandasında bir matça çıxıb.