"Qəbələ"nin baş məşqçi əvəzi Elmar Baxşıyev Azərbaycan Premyer Liqasının V turunun "Səbail"lə səfər oyunundan (1:1) sonra mətbuat konfransı keçirib. Sportinfo.az xəbər verir ki, gənc mütəxəssis əvvəlcə oyun haqda fikirlərini bölüşüb.
- Oyunun ağır keçəcəyini əvvəlcədən bilirdik. “Səbail” yerli futbolçulardan təşkil olunmuş yaxşı komandadı. Rəqibi düzgün təhlil edib, yetirmələrimizi oyuna yaxşı hazırlaya bildik.
- Bu, “Qəbələ”nin maksimumu idi?
- “Sumqayıt”la yoxlama oyunundan başlayaraq artan qrafik cızırıq. Bu da məni sevindirir. İki zədəlimiz var. Artıra bilərik.
- Ülvi İsgəndərovun qapıçının üstündən atdığı top çərçivəyə düşmədi. Bunu oyunun qırılma anı saymırsız?
- Gənc komandayıq. Əsas odu artıraq. Həmin epizod qol da ola bilərdi.
- Bu, tapşırıq idi ki, fasilədən sonra müdafiəyə çəkiləsiniz?
- Xeyr, belə tapşırıq yox idi. Yəqin ki, rəqib də təzyiq göstərdi, uşaqlara da hesab təzyiq göstərirdi.
- Hakimlikdən narazı idiniz?
- Xeyr, normal idarəetmə oldu. Futbol – emosiyalar oyunudu. Ola bilər hansısa epizodda etiraz edəm.