PSJ-in braziliyalı hücumçusu Neymar "Liverpul" və "Valensiya"nın sabiq futbolçusu Fabio Aurelioya sərt cavab verib.
Sportinfo.az xəbər verir ki, Aurelio Neymarın "Qızıl top"u qazana bilməyəcəyini bildirib.
O iddia edib ki, Neymar üçün futboldan daha vacib olan məsələlər var. Sabiq “Barselona”lı ulduzun cavabı belə olub:
“Ağızlarını açıb, boş-boş danışan keçmiş oyunçulardan bezmişəm.
Onun beş dəqiqəlik müsahibəsi var və dediyi hər şey başqalarının həyatı haqqındadır. Tənqid etmək istəyirsənsə, tənqid et. Amma belə boşboğazlıq etmək olmaz”.
Neymar 2017-ci ildən PSJ-də çıxış edir. O, bu mövsüm Liqa 1-də 18 matçda 11 qol vurub və 4 məhsuldar ötürmə edib.
