“Məncə, bunun səbəbi akademiyalarda gizlənir”.
Bu sözləri Sportinfo.az-a açıqlamasında “Neftçi”nin əvəzedici komandasının qolçusu Ömər Qurbanov deyib.
Qış fasiləsində “Səbail“i “ağ-qaralar“a dəyişən və məhsuldarlıq nümayiş etdirən ön xətt oyunçusu bildirib ki, futbolumuzda ən böyük problemlərdən biri də yaxşı hücumçu azlığıdır.
Sanki indiki uşaqlar hücumçu olmaq istəmir:
“Bizə ilk gündən ən çox verilən tapşırıq bunlardır - topu itirmə, aldatma, dəqiq oyna. Aldada bilsən də, artıq bunu etmirsən.
Belədə özgüvən itir. Tədricən hücumçu mövqeyini müdafiəçi mövqeyinə dəyişməli olursan.
Çünki müdafiədə oynamaq üçün qeyri-adi nəyəsə ehtiyac yoxdur. Avropada uşaqlara səhv etməyə şərait yaradılırsa, bizdə bir qədər fərqlidir.
Hətta bir səhvə görə karyeran pis istiqamətə dəyişə bilər“.
