Bakıda keçirilən FIFA U-15 dünya çempionatı və festivalına yekun vurulub.

A liqasının həlledici final oyununda İspaniya və Çexiya komandaları qarşılaşıb.

Bakı Kristal Zalında keçirilən həlledici oyun İspaniyanın qələbəsi ilə başa çatıb - 3:0.

Beləliklə, ilk dəfə Azərbaycanda keçirilən U-15 dünya çempionatının qalibi adını İspaniya qazanıb.

189 ölkənin yarışdığı çempionatda Azərbaycan isə 84-cü yeri tutub.

Əlbəttə, nəticəyə görə baş məşqçi Famil Xəlilovun məsuliyyəti var. Heç bir məşqçi bu məsuliyyətdən kənarda qala bilməz.

Lakin U-15 milli komandasının baş məşqçisi futbolçuları il ərzində klub məşqçiləri kimi hər gün görmür. Milli toplanışları və məhdud hazırlıq müddəti çərçivəsində işləyir.

Futbolçuların gündəlik məşq keyfiyyəti, texniki-taktiki hazırlığı, fiziki inkişafı və oyun təcrübəsi isə əsasən çıxış etdikləri klublardakı prosesdən asılıdır.

Ona görə də bütün məsuliyyəti yalnız milli komandanın məşqçisinin üzərinə qoymaq nə ədalətlidir, nə də problemin həllinə kömək edir.

Unutmayaq ki, bu uşaqlar Azərbaycan futbolunun gələcəyidir.

Onların beynəlxalq səviyyədə belə bir turnirdə iştirak etməsi özü böyük təcrübədir. Bu təcrübədən düzgün nəticə çıxarmaq, çatışmazlıqları aradan qaldırmaq və inkişafı davam etdirmək lazımdır.

Əgər həqiqətən Azərbaycan futbolunun inkişafını istəyiriksə, yalnız millinin nəticəsini deyil, futbolçunun yetişdiyi bütün sistemi müzakirə etməliyik. Klublar, məşqçilər, akademiyalar, federasiya və futbol ictimaiyyəti bu prosesin bir hissəsidir.

Uşaqlarımızın üzərinə uğursuzluq damğası vurmaq yox, onların inkişafına dəstək olmaq lazımdır.

Bu gün onlardan dünya səviyyəsində nəticə tələb etməkdənsə, sabah həmin səviyyəyə çatmaları üçün şərait yaratmalıyıq.

Tənqid etmək olar, hətta lazımdır. Amma tənqid inkişaf naminə olmalıdır, ruhdan salmaq naminə yox.

Futbol yalnız qazanılan kuboklardan ibarət deyil. Futbol həm də yetişdirdiyimiz futbolçular, yaratdığımız sistem və gələcəyə qoyduğumuz sərmayədir.

Gəlin, nəticələrdən dərs çıxaraq, uşaqlarımızı qoruyaq və Azərbaycan futbolunun gələcəyinə birlikdə sahib çıxaq.

Çünki bu gün dəstəyə ehtiyacı olan həmin uşaqlar sabah ölkəmizin əsas millisinin formasını geyinə bilərlər.

İnkişaf istəyiriksə, ilk növbədə inkişaf etdirən mühit yaratmalıyıq. Təkcə nəticə tələb etməklə futbol inkişaf eləmir!

SPORTİNFO.AZ