Bakıda keçirilən futbol üzrə U-15 dünya çempionatı və festivalında Azərbaycan millisi üçüncü oyununa çıxıb.
Sportinfo.az xəbər verir ki, baş məşqçi Famil Xəlilovun rəhbərlik etdiyi yığmamız Hövsan Yarış Kompleksində Avstraliya ilə qarşılaşıb.
Görüş rəqib komandanın 3:1 hesablı qələbəsi ilə yekunlaşıb. Beləliklə, Azərbaycan təmsilçisi turnirdə ilk məğlubiyyətini alıb.
Millimiz əvvəlki iki qarşılaşmada uğurlu nəticələr əldə edib. İlk oyunda Timor-Lesteni 6:0 hesabı ilə məğlub edən futbolçularımız ikinci görüşdə Andorra üzərində 1:0 hesablı qələbəyə seviniblər.
Azərbaycan yığması növbəti iki matçını oktyabrın 26-da keçirəcək. Komandamız saat 11:30-da İsraillə, 18:15-də isə Haiti ilə üz-üzə gələcək.
FIFA U-15 Dünya Çempionatı və Festivalında 189 ölkənin futbol assosiasiyalarını təmsil edən komandalar mübarizə aparırlar. Yarış çərçivəsində ümumilikdə 1000-ə yaxın qarşılaşmanın təşkili nəzərdə tutulub.
Oktyabrın 30-da başa çatacaq turnirin əsas oyunları Hövsan Yarış Kompleksində keçirilir. Final qarşılaşması isə Bakı Kristal Zalında təşkil olunacaq.
