Azər Bağırov bu gün balıq tutmağa getsə və toruna qızıl balıq düşsə, həmin qıxıl balıq onu buraxmasının qarşılığında 3 arzusunu yerinə yetirməyə boyun olsa, bilirsiz, nə istəyər?
İnanın, birnəfəsə deyər ki, «Kəpəz» rəhbərliyinə pul yetir, yeni futbolçular ala bilək.
Bu dəqiqə onun başqa dərdi yoxdur. Oturub-durur ancaq bu haqda fikirləşir.
Bağırovdan soruşan olsa ki qışadək kimləri düşərgədən göndərmək istəyirsən, yenə birnəfəsə 12-15 nəfərin adını çəkər.
«Kəpəz»də vəziyyət, doğrudan da, acınacaqlıdır. Bağırov səfərdə «Şamaxı»nı 4:1 udandan sonra elə bilirdi ki, pis günlər artıq arxada qaldı, onu xoşbəxt gələcək gözləyir.
Yanıldı. «İmişli»yə 0:3, «Neftçi»yə 1:5 və «Sabah»a 1:3 hesablı məğlubiyyətlər bəlli etdi ki, Azər Bağırovun görəcəyi günlər varmış, komanda da həminkidir - aşsüzən.
Ona vaxt veriləcək. Klub rəhbərliyi ayda bir məşqçi dəyişməyəcək ki..? Adil Şükürovun ayrılmasının 1 ayı təzəcə tamam olub.
Sadəcə, Azər Bağırov qış fasiləsinədək neçə xal toplaya biləcək? Bax, budur e, əsas sual!
Futbolçular bilir ki, köhnə-yeni baş məşqçinin onlar haqda rəyi nədir. Eşidiblər ki, kimləri göndərmək istəyir.
Belə ab-havada hansı biri «Kəpəz» üçün can qoyar? Bağırovun səhvi ondadır ki, islahatlar barədə indidən anons verir.
Tələsir yenə. Nə olub, qoy, səhər açılsın da bir…
ELXAN
