«Kəpəz»in Azər Bağırovla qeyri-sabit çıxışı 13-cü turda da davam etdi.
Nəhs tur onlara məyusluq yaşatdı, bu dəfə «Zirə»yə uduzdular.
Yevlaxdakı qarşılaşmada kim ilk qolu vursaydı, o da 3 xalı aparacaqdı. «Kəpəz» o 3 xal üçün çox iş görmədi.
Mübarizə əsasən mərkəzdə getdi. Qapılar ağzında təhlükəli anlar az qeydə alındı.
Bağırov bilir ki, taleyi tükdən asılıdır. Beli futbolçular sarıdan bərk deyil.
Burada elə legionerlər var ki, ona münasibəti pisdir. Qış fasiləsində yola salınacaqlarına əmindirlər.
Baş məşqçi həmin əcnəbi oyunçuların bir neçəsini dünən Yevlaxda meydana buraxmışdı.
Ehtiyat skamyanın boyu qısadır, «mehriban düşmənlər»in iki-üçünü kənarda saxlasa, gərək komanda meydana 8-9 nəfərlə çıxsın.
Yusif İmanov bu sıraya aid deyil. Amma onun da oyun praktikası yox dərəcəsindədir.
Altı ay «çərçivə» üzü görməyən qapıçı bunun əziyyətini çəkir indi. İlk qolda səhvi vardı. Mikelsin üstünə gələn zərbəsinə anında reaksiya vermədi.
Bağırov son aylar çox kökəlib. Deyəsən, «doktor Karlson»la qiyabi rəqabətə girişib. Arıqlamaq istəsəydi, ona təklif edərdik ki, özü çıxıb müdafiədə oynasın.
Bu zonada çıxış eləyənlər gülməli və ucuz səhvlərə yol verməkdən utanmır, onsuz da.
ELNUR
.jpg)
