Azərbaycan millisi noyabrın 16-da gecənin sürpriz nəticəsinə imza atdı.
Ölkəmizin bir nömrəli futbol komandası AVRO-2024-ün seçmə mərhələsi çərçivəsində Bakıda İsveçi darmadağın etdi – 3:0.
Oyun başa çatandan sonra İsveç seçməsinin aparıcı futbolçularından olan Deyan Kulusevski jurnalistlərə verdiyi müsahibədə maraqlı açıqlama ilə yadda qalıb.
O, Bakıya gələn 50-yə yaxın isveçli fanatın səfər xərcini qarşılamağa hazır olduğunu bildirib:
“Nəsə demək çətindir. Bu hesabla uduzmaq utancvericidir. Bakıya gələn azarkeşlərimizi sevindirmək istəyirdik. Ağır məğlubiyyətə görə onlardan üzr istəyirəm.
Fanatlarımız buna layiq deyil. Bura səfər edən azarkeşlərin xərclədiyi pulu qaytarmağa hazıram. Göstərdikləri dəstəyə görə hər birinə təşəkkür edirəm”.
2019-cu ildən İsveç millisinin şərəfini qoruyan 23 yaşlı yarımmüdafiəçi meydana çıxdığı 34 oyunda 3 qolla yadda qalıb.
Vaxtilə “Atalanta”, “Parma”, “Yuventus” kimi komandaların şərəfini qorumuş Kulusevski 2021-ci ildən “Tottenhem”in uğurları üçün tər tökür.
HƏBİB / SPORTİNFO.AZ
.jpg)
