"Turan Tovuz" I Divizionda 2016/17 mövsümünün qalibi olub. Sportinfo.az xəbər verir ki, bölgə təmsilçisinin çempionluğu bu gün rəsmiləşib. Belə ki, 24-cü tur çərçivəsində səfərdə "Zaqatala" ilə qarşılaşan "Turan Tovuz"un ən yaxın icləyicisi "Səbail" bu görüşdə xal itkisi ilə üzləşib - 1:1. Bu isə Əsgər Abdullayevin komandasının mövsümün sonuna 2 tur qalmış çempionluğunu rəsmiləşdirməsi ilə nəticələnib.
Hazırda "Turan Tovuz" 57 xalla ilk sırada, "Səbail" isə 51 xalla ikinci pillədə qərarlaşıb. Düzdü, tovuzlular son iki oyunda uduzsa və “Səbail” 2 oyunda 6 xal qazansa, bu fərq aradan qalxa bilər. Amma şəxsi oyunlardakı üstünlük "Turan Tovuz"un tərəfindədi.
"Turan"ın çempionluğunun rəsmiləşdiyi məlum olan andan Tovuzda əsl bayram əhval-ruhiyyəsi hökm sürür. Stadiondan başlayan bayram ab-havası şəhərin mərkəzi meydanına kimi davam edib. Rayon rəhbərliyi, eləcə də bütün tovuzlu azarkeşlər meydana axışaraq çempionluğu qeyd ediblər. Bayram tədbirləri günlərlə davam edəcək.
