«Mingəçevir»in baş məşqçisi Elman Sultanov bu gün ilk imtahanı verib.
Söhbət «Pro» kaieqoriyası almaq üçün onun etdiyi növbəti cəhddən gedir.
Belə ki, mütəxəssis Mingəçevir şəhər stadionunda 20-yə yaxın futbolçunun iştirakıyla AFFA-dan gəlmiş «mentlər»in qarşısında meydana çıxıb. Bu proses sabah saat 15:00-da bir daha təkrarlanacaq.
Sultanov onunla birgə kurslara qatılmış digər həmkarlarından fərqli olaraq, yayda «Pro» ala bilməyib. Praktiki məşğələlərdən kəsildiyi üçün lisenziya alması indiyə qalıb.
«Difai»ni ötən mövsüm I Liqada saxlamağı bacarmayan çalışdırıcı bugünkü imtahandan öncə çətin vəziyyətlə üzləşib.
İki aydan artıqdır maaş almayan və bu səbəbdən son iki həftədə məşqə çıxmayan «Mingəçevir»li oyunçuları o, güc-bəla ilə dilə tutub.
Deyib ki, əgər məşq baş tutmasa, «Pro» almaq üçün 2 ildir çəkdiyi bütün əziyyət hədər gedəcək. Xahiş edib ki, ona köməklik göstərsinlər, əks halda, pərt vəziyyətdə qalacaq.
SPORTİNFO.AZ
