"Zirə"nin qış fasiləsində heyətinə qatdığı əcnəbilərdən biri də Eren Aydın oldu.
23 yaşlı türkiyəli artıq 6 görüşdə meydanda olub.
"Qartallar"ın formasında baxımlı qolla yadda qalıb.
Bir sözlə, liqaya tanış sima hesab edilə bilər.
Sportinfo.az-a açıqlama verən hücumçu Premyer Liqa ilə bağlı ilkin təəssüratlarını bölüşüb:
"Çox yaxşı rəqiblər var. Xüsusilə "Sabah" və "Qarabağ"ı çox bəyənirəm. Topla inanılmaz oynayırlar.
Bu liqanın çox üstündə komandalardı. Avropa səviyyəsində olduqlarını deməliyəm.
Son 3 mövsümdə liqa çox inkişaf edib. "Qarabağ"ın Çempionlar Liqasında pley-off oynamasının da bunda rolu çoxdur".
Eren "burada qalmağa davam edəcəksənmi" sualına isə qısa cavab verib:
"Türkiyə və Azərbaycan qardaş ölkələrdi. Burada olmaqdan məmnunam. Amma son qərar mövsümün sonunda veriləcək".
XANOĞLAN / SPORTİNFO.AZ
