Konfrans Liqasının əsas mərhələsini hədəf seçən “Zirə” bu gün növbəti oyuna çıxacaq.

“DAC 1904”lə “Osiyek”i mübarizədən kənarlaşdıran qəsəbə təmsilçisinin bu dəfəki rəqibi “Omoniya”dır.

Avrokubokların mütəmadi iştirakçısı olan Kipr təmsilçisi son 4 ildə 3 dəfə qrup mərhələsində çıxış edib. Yalnız ötən il Konfrans Liqasında mübarizəni erkən – 3-cü təsnifatda dayandırıb.

Buna baxmayaraq, “ağ-yaşıllar”ın son 2 ildəki çıxışı təhlükə saçır.

“Zirə”nin rəqibi ötən mövsüm Konfrans Liqasında 4 oyun keçirib. “Qəbələ”ni hər 2 matçda məğlub edib (3:2, 4:1), “Midtülland”ı Nikosiyada udub və yalnız səfərdəki yenilgiyə görə kənarda qalıb – 1:0, 1:5.

Cari mövsümdə 2-ci təsnifat mərhələsində Kutaisi “Torpedo”sunun qapısından ümumilikdə 5 top keçirib – 2:1, 3:1. Növbəti etapda “Fehervar”ın qapısına ilk oyunda 1, cavab görüşündə 2 cavabsız qol vurub.

Bu, o deməkdir ki, “Omoniya” avrokuboklarda keçirdiyi son 8 duelin 7-ni qələbə ilə başa vurub, yalnız 1-də məğlub olub.

Bu müddətdə doğma meydanda keçirdiyi 4 oyunun hamısında qələbəyə sevinib ki, “Qəbələ”, “Midtülland”, “Torpedo” və “Fehervar” Kiprdən yenildi ilə ayrılıb.

“Zirə”ni səfər qarşılaşmasında kifayət qədər ciddi sınaq gözlədiyini “ağ-yaşıllar”ın öz meydanında keçirdiyi oyunlardakı nəticələrdən görmək mümkündür. Ümid edək ki, “qartallar” vətənə sərfəli nəticə ilə dönməyi bacaracaq.

Avqustun 22-də GSP stadionunda təşkil olunacaq matç Bakı vaxtı ilə saat 21:00-da start götürəcək.

Bir həftəsonra baş tutacaq cavab qarşılaşmasının start fiti isə 20:00-da səslənəcək.

HƏBİB / SPORTİNFO.AZ