Qəbələdə ədalətli nəticə 1 xal olardı.
Həm «Qəbələ», həm də «Zirə» məhz heç-heçəyə layiq idi.
90 dəqiqə zövq verməyən bir oyun izlədik. Adda-budda bəzi təhlükəli epizodlar yarandı, vəssalam.
AFFA-nın azarkeş qadağası üzündən dəstəksiz qalan «Qəbələ» oyunu mərkəzi zonadan çıxarıb meydanın rəqibə aid olan hissəsinə keçirməyə iki-üç kərə cəhd etdi.
«Zirə»yə gəlincə, qonaqlar pressinq hesabına gedişatı öz əlində tutmağa cəhd göstərdi. Ancaq tərəflərin heç bir fikrini reallaşdırmağa sonacan getmədi.
Futbol adına nə gördüksə, son 4 dəqiqədə gördük.
Öncə Ülvi İsgəndərovun mərkəzdən vurduğu qol, ardınca Hacıağa Hacılının 1 metrdən başla topu boş qapıdan keçirə bilməməsi…
Sözün bütün mənalarında inanılmaz bir sonluq! Rəşad Sadıqov demiş, bu, qismət məsələsidir.
Nədirsə, odur. Və ondan qaçmaq qeyri-mümkündür.
ELNUR
