Rəşad Sadıqov: "Problemlər var, axtarıb..." - VİDEO

14 Avqust 2022 02:20 Zirə 577
Rəşad Sadıqov: "Problemlər var, axtarıb..." - VİDEO

"Zirə" Azərbaycan Premyer Liqasının 2-ci turunun oyununda öz meydanında "Sabah"a 1:3 hesabı ilə məğlub olub.

Sportal.az xəbər verir ki, "qartallar"ın baş məşqçisi Rəşad Sadıqov bu barədə sualları cavablandırıb:

- Çox danışacaq bir şey yoxdu. Rəqib layiq olduğu qələbənbi qazandı. Çox kobud səhvlərdən qollar buraxdıq. Bundan sonra rəqib daha özünəinamlı oynadı. Hesab arasındakı fərqi azalda bildik və ümidləndik ki, oyunu çevirə bilərik. Amma ikinci hissənin əvvəlində buraxdığımız kobud səhv oyunun taleyini həll etdi. Çox ucuz səhvlərdən qollar buraxırıq. "Makkabi" ilə oyunda da belə oldu, indi də. Belə olan halda istədiyimiz futbolu oynamaq çətin olur.

- Təmkin Xəlilzadənin oyununda eniş yaşanır. Bununla bağlı nə deyə bilərsiz?

- Mövsümün əvvəlidi. Ola bilər ki, hansısa futbolçu gec formaya düşsün. Tək o yox, bir neçə oyunçumuz daha istəkli oynamalıdı. Problemlər var, axtarıb həll etməyə çalışacağıq. Eniş deməzdim, daha istəkli oynamalıdır.

Yeni transfer Moizin oyununu necə dəyərləndirərdiniz?

- Məşqçi kimi etmək istəmədiyimi ilk dəfə etdim. Cəmi bir həftə idi ki, məşq edirdi. Sadəcə çıxış yolumuz yox idi. Özü ilə danışdım ki, 60-65 dəqiqə oynayar. Amma 90 dəqiqə oynadı və məni yaxşı tərəfdən təəccübləndirdi.

- Hamidu Keytanın olmaması oyununuza nə dərəcədə təsir etdi?

- Onsuz da, heyət geniş deyil. Onun yoxluğu hücum xəttində hiss olunmaya bilməz. Hacıağa Hacılı, Dimitrios Çantakias, Filipe Paxtman da yenidən zədələnib. Bu cür itkilərimiz var. Futbolda belə problemlər olur. Bunları həll edib yolumuza davam etməyə çalışacağıq. Qarşıda 34 tur var. Hər hansı problem var, indi olması daha yaxşıdı, nəinki mövsümün ortasında.

- Transfer məsələsi nə yerdədi?

- Heyəti genişləndirməliyik. Ola bilər ki, çox futbolçumuzun olmaması futbolçularda rahatlıq yaradır. Biri ilə razılaşmışıq, iki günə Bakıya gələcək. Transferlərin son periodundayıq. İndiyə biz istəyənlər qalar ya, yox bilmirəm. Olmasa, qışda edəcəyik.

- Komandadan narazılıqlarınız nədən ibarətdi?

- Kəmiyyət və keyfiyyətlə bağlı poroblemlərimiz var. İstəyərdik ki, geniş heyətimiz olsun. Həmişə futbolçulardan razı oluram. Amma meydanda yüz faizini verməyəndə, maksimum motivasiya olmayanda problemlər yaranır. Əsas keyfiyyətlərimizdən biri aqressiv və istəkli oynamaqdı. "Makkabi" ilə matçdan sonra problemlər yaşaırıq. Niyə çempionat matçlarında bunları yaşadıq, təhlil edəcəyik.

- Oyununuzda nə çatmadı?

- Bu cür oyunlarda nəticə üçün ucuz qollar buraxmamalısan. Rəqibin usta oyunçuları var. Amma belə qollar buraxdıqdan sonra oyunu dəyişmək çox çətindi. Daha istəkli oynamalıydıq. O zaman bərabər mübarizə gedərdi. Belə oynadıqdan sonra heç bir şans yoxdu.

- "Makkabi" ilə oyundakı "Zirə" ilə indiki arasında fərq görünür...

- Razıyam. Aqressiv və dözümlü futbolçuları görmürəm. Təhlil edəcəyik. Niyə belə olduğunu bilmirəm. İki ildi bu komandadayam. Aqressivlik və dinamikanın aşağı düşməsini görürəm. Mənim üçün də naməlumdu.

- Rüstəm Əhmədzadə döyüşür. Ondan razısız?

- Görünür ki, Rüstəm potensialını daha da aça bilər. Çox hərəkətlidi. Düşünürəm ki, Azərbaycan futboluna çox xeyir verə bilər.

- Yeni transferin mövqeyi nədir?

- Mərkəz yarımmüdafiəçisidi.

- Bu mövsüm "Zirə" üçün daha çətin olacaq?

- Keçən il də asan olmadı. Amma bu il daha rəqabətli çempionat keçəcək. İlk turlar da bunu göstərir. Çalışacağıq ki, keçən ilkindən də asan olsun. Hər şeyi zaman göstərəcək. Düşünürəm ki, yaxşı olacaq.

Digər Xəbərlər
Xəbər Lenti