Albaniyada "Biliş" klubunun formasını geyinən Eltun Turabov Sportinfo.az saytına müsahibə verib:
- Son turlarda "Kukesi" və "Skenderbeu"ya uduzdunuz. Son iki oyundakı uğursuzluğu nə ilə əlaqələndirirsən?
- Xüsusi bir səbəbi yoxdur. Əvvəlki oyunlara necə hazırlaşırdıqsa, son oyunlara da elə hazırlaşırıq. Sadəcə, rəqiblərimiz bizi artıq daha da ciddiyə alır. Məsələ budur.
- Albaniyada ilk altı turda daim əsas heyətdə meydana çıxmışdın. Amma sonradan oynamadın. Nə ilə bağlı idi?
- Zədələndiyim vaxta kimi komandanın əsas heyət üzvü idim. Amma zədələndikdən sonra formaya düşmək vaxt aldı. Amma əlimdən gələni edirəm ki, əsas heyətdəki yerimi qaytarım.
- Düşünmürsən ki, bəlkə də baş məşqçinin sənə olan inamı azalıb?
- Xeyr, mən belə olduğunu düşünmürəm. Əsas heyətdən kənarda qalmağım sırf zədə ilə bağlıdır. Özümə qarşı inamsızlıq hiss etmirəm. Dediyim kimi əlimdən gələni edəcəm ki, heyətdəki yerimi qaytarım.
- Hazırda "Biliş" 3-cü pillədədir. Yəqin ki, komandanın əsas məqsədi avrokuboklara vəsiqə qazanmaqdır? Səncə, bunu bacara biləcəksiniz?
- Mövsümün əvvəlindəki kimi nəticələr qazanmağa başlasaq, ola bilər.
- Albaniyada oynamaq sənə nə qazandırdı?
Təcrübə baxımından çox kömək oldu. Hər halda fərqli ölkənin futboluyla tanışlıq istənilən halda yaxşı təcrübədir. Amma heç bir klubdan təklif almamışam.
- Qışda Azərbaycana qayıtmağı planlaşdırırsan, yoxsa Albaniyada qalmaq niyyətindəsən?
- Hazırda "Biliş"in uğurları üçüm çalışıram. Buna görə də bu haqda hələ ki, düşünmürəm. Hazırda yalnız komandaçın oyunlarına köklənmişəm.
- "Biliş"in sənin transfer hüququna yiyələnmək planı var?
- Bəli, müqavilə ilə "Sabah"a məxsusam. "Biliş" mənim transfer hüququma yiyələnmək istəyir ya, yox bu barədə məlumatsızam.
- Azərbaycan Premyer Liqası kənardan necə görünür?
- Məncə, Azərbaycan çempionatı maraqlı keçir. Bir neçə komanda avrokuboklara vəsiqə uğrunda mübarizə aparır.
- "Sabah"ın hazırda turnir cədvəlinin altıncı pilləsində olmasına necə şərh verərdin?
- Hələ çempionatın ilk dövrəsi bitməyib. Əlbəttə ki, "Sabah"ın dəyişiklik etmək şansı çoxdur. Bu komandanın böyük potensialı var.
Mirbağır CƏFƏRLİ