"Sabah"da xorvatiyalı baş məşqçi - RƏSMİ TƏYİNAT

26 Noyabr 2019 09:12 Sabah 1 200
"Sabah"da xorvatiyalı baş məşqçi - RƏSMİ TƏYİNAT

"Sabah”ın yeni baş məşqçisi bəlli olub. Sportinfo.az klubun saytına istinadən xəbər verir ki, komandanı bundan sonra xorvatiyalı mütəxəssis Jelko Sopiç çalışdıracaq.

45 yaşlı məşqçi ilə 1,5 illik müqavilə bağlanıb. 31 yaşlı xorvatiyalı mütəxəssis Marko Lozo isə Sopiçin köməkçisi təyin olunub.

Müvəqqəti olaraq baş məşqçi funksiyasını yerinə yetirən İqor Ponomaryov klubda Müşahidə Şurasının üzvü kimi fəaliyyətini davam etdirəcək.

Xorvatiyalı mütəxəssis futbolçu karyerası ərzində Xorvatiyanın “Zaqreb”, “Slaven Belupo”, “Lokomotiva”, Almaniyanın “Borussiya” (Münhenqladbax), “Rot Vays Alen” klublarında çıxış edib.

Sopiç məşqçi karyerasına Zaqrebin “Lokomotiva” klubunda (2011/12) başlayıb. Bu klubda köməkçi məşqçi kimi çalışmış xorvat mütəxəssis, daha sonra Xorvatiyanın “Rudes” (2012/15) və “Dinamo Zaqreb B” (2015/16) klublarında baş məşqçi, “Dinamo Zaqreb”in əsas komandasında (2016/17), Birləşmiş Ərəb Əmirliklərinin “Əl-Əyn” klubunda (2017/18) köməkçi məşqçi, “Əl-Əyn”in U-21 komandasında (2018/19) baş məşqçi vəzifəsində çalışıb. 2016/17 mövsümündə 1 ay Zaqreb “Dinamo”unda, 2018/19 mövsümündə isə 3 oyunda “Əl-Əyn”də baş məşqçi funksiyasını yerinə yetirib.

“Əl-Əyn”lə BƏƏ çempionluğunu və “Prezident kuboku”nu qazanıb (2017/18). Bu klubun U-21 komandası ilə ölkə çempionu olub (2018/19).

Digər Xəbərlər
Xəbər Lenti