Proqnozları alt-üst edən “İmişli” növbəti sürprizin planlarını cızır.

Ötən həftə rəqib meydanında “Neftçi”ni 3:2 hesabı ilə məğlub etməyi bacaran aran təmsilçisi bu dəfə “Sabah”ı qonaq edəcək.

Komandaların futbolçu keyfiyyətlərini, səviyyə və təcrübə fərqini nəzərə alsaq, masazırlılar imişliləri bir baş üstələyir. Elə avqustun 31-dəki qarşılaşmadan əvvəl də beləydi.

Lakin həmin gün “Bank Respublika Arena”da keçirilən görüşdə Premyer Liqanın debütantı avrokuboklardakı çıxışını yenicə başa vurmuş “tələbələr”i üstələməyi bacarmışdı. Abbas Ağazadənin yeganə qolu “İmişli”yə cari mövsümdə ilk qələbəni gətirmişdi.

Xəbəriniz olsun ki, “Sabah” cari mövsümdə ilk və son məğlubiyyətini məhz “İmişli”dən alıb. Çox güman, məşqçi və futbolçu heyəti bu faktdan xəbərdardır.

Azərbaycanda ilk ilini keçirən Jorj Kaşkilya ilə Valdas Dambrauskas geridə qalan dönəmdə futbol savadını ortaya qoymağı bacarıb.

Hər iki əcnəbi çalışdırının oynatdığı futbolda sistem və çəkilən əziyyət müşahidə olunmaqdadır. Heç şübhəsiz bugünkü dueldə taktika savaşı özünü aşkar göstərəcək.

Baş məşqçi mövzusuna toxunmuşkən daha bir maraqlı faktı xatırlatmaq yerinə düşər. “Sabah”ın litvalı çalışdırıcısının Azərbaycanda qarşılaşdığı legioner həmkarları ilə duellərdə üstünlüyü var.

Kaxaber Tsxadadze (Qəbələ) və Kurban Berdıyevlə (Turan Tovuz) duellərdən üzüağ çıxmağı bacarıbsa, Saşa İliçlə (Sumqayıt) mübarizədə qalib müəyyənləşməyib. Dambrauskası üzən yeganə əcnəbi mütəxəssis Jorj Kaşkilyadır. Bu dəfə ya qisas baş tutacaq, ya da “İmişli” futbol ictimaiyyətinə növbəti şoku yaşadacaq.

Yeri gəlmişkən, “Sabah”ın baş mıəşqçisini hələ ki, azərbaycanlı məşqçilərdən heç biri təəssüfləndirə bilməyib.

Komandaların turnir cədvəlindəki mövqeyi də matça prinsipiallıq qatan məqam sayıla bilər. “Tələbələr” 22 xalla 4-cü, bölgə təmsilçisi 15 xalla 8-cidir.

Bu, o deməkdir ki, debütantın mümkün qələbəsi onları üst pillələrə qaldıracaq, “Sabah”a “Sumqayıt”la “Araz-Naxçıvan”ın gerisinə düşmək təhlükəsini yaradacaq.

Bu gün Quba Olimpiya İdman Kompleksinin meydanında reallaşacaq duelin start fiti saat 14:50-də çalınacaq.

HƏBİB / SPORTİNFO.AZ