“Qərar artıq verlib və onu müzakirə etmək istəmirik”.
Bu sözləri Sportinfo.az-a açıqlamasında “Qarabağ”ın mətbuat xidmətinin rəhbəri Gündüz Abbaszadə deyib.
Məlum olduğu kimi, UEFA Konfrans Liqasının Fransada "Marsel" və "Qarabağ" arasında keçirilmiş pley-off mərhələsinin ilk oyununda baş verən hüquqi pozuntularla bağlı qərarlar açıqlanıb.
Nəzarət, Etika və İntizam Komitəsi Fransa klubuna ümumilikdə 44250 avro cərimə kəsib.
Cərimənin 20 min avrosu azarkeşlərin təxribatçı siyasi və təhqiramiz hərəkətləri ilə əlaqədar tətbiq olunub.
Qarşılaşmanın gedişində Ermənistan və qondarma rejimin simvolunun nümayiş etdirilməsi "Marsel"ə bu qədər məbləğə baha başa gəlib.
"Marsel" daha 14000 avronu tribunalarda ümumi istifadə üçün nəzərdə tutulan keçidlərin tutulması səbəbindən ödəyəcək. 10250 avro cərimə isə fişəng yandırılması ilə əlaqədar tutulacaq.
Fevralın 17-də keçirilmiş həmin qarşılaşma "Marsel"in qələbəsi ilə yekunlaşıb - 3:1. Fevralın 24-də Bakıda təşkil olunmuş cavab oyununda isə "Qarabağ" 0:3 hesabı ilə uduzub.
G.Abbaszadəni dinləyək:
“İlk oyundakı hadisələrə görə UEFA-nın nümayəndəsinə şikayət etmişdik. Klubumuza qarşı törədilən bu iyrənc hərəkətə yol verənlərin cəzalandırılmasını istəmişdik.
UEFA hadisələri araşdırıb və mövqeyini bildirib. İndi başqa sözə ehtiyac yoxdur”.
