“Mən Ukraynanın qərbində yerləşən Çernovtsı şəhərində yaşadığımdan, bura Rusiya hərbçiləri girməyib.
Bizdə vəziyyət yaxşıdır. Ancaq bura Ukraynanın digər şəhərlərindən çoxlu qaçqın gəlib.
Onların məskunlaşması, qidalanmasına kömək etməklə məşğuluq”.
Sportinfo.az xəbər verir ki, bunu oxu.az-a Ukraynanın karate millisinin Azərbaycan əsilli üzvü Rizvan Talıbov deyib.
24 yaşlı ikiqat Avropa mükafatçısı olan Rizvan Talıbov Ukraynanı tərk etməyəcəyini açıqlayıb:
“Biz tərəfdə sakitlikdir. Kiyev, Xarkov, Odessa, Xerson, Çerniqovda gərgin döyüşlər gedir. Bizim şəhər Rumıniya və Moldova sərhədinə yaxındır deyə burada sakitlikdir.
Ancaq Rusiyanın hücumu bizim şəhərə də gözlənilir. Ona görə də anamla bacımı Bakıya yola salmaq istəyirəm.
Amma özüm burada qalacağam, Ukraynadan getməyəcəyəm. Burada əlimdən gələn köməyi edəcəyəm. Qaçqınlara, Ukrayna Ordusuna lazımi dəstək veririk”.
