FİFA Bəhlul Mustafazadənin şikayəti üzrə araşdırmanı yekunlaşdırıb.
Beynəlxalq futbol qurumu yekun qərarını martın 17-də açıqlayacaq.
Ötən ilin yayında “Sabah”ın formasını geyinən Birləşmiş Ərəb Əmirlikləri təmsilçisi “Əl-Əyn”ə transferi gündəmə gəlmişdi.
Həmin vaxt “tələbələr” də müəyyən təzminat qarşılığında müdafiəçisi ilə vilaşmağa hazır olduğunu bildirmiş və Bəhlulla yolları ayırmışdı.
Ancaq sonradan, daha doğrusu, tərəflər arasında 3 illik müqavilə bağlanmasına rəğmən, BƏƏ təmsilçisi anlaşmanı birtərəfli qaydada pozmuşdu ki, məhz bu səbəbdən Mustafazadə “Əl-Əyn”dən FİFA-ya şikayət ünvanlamışdı.
Hazırda “Qarabağ”ın formasını geyinən arxa xətt oyunçusu BƏƏ klubundan 900 min avro təzminat tələb edir. Çünki “Əl-Əyn” rəsmi sənədlərə əsasən 3 il müddətində Bəhlula məhz bu qədər maaş ödəməyi üzərinə götürüb.
Mustafazadə hüquqlarının qorunmasını rusiyalı vəkillərə tapşırıb. Onlar lazım olan faktları FİFA-ya göndərib. Qurum qarşı tərəfdən də bir neçə sənəd istəyib.
Hüquqşünaslar millimizin üzvünü əmin edib ki, FİFA bu məsələdə onun lehinə qərar verəcək.
Araşdırmaların 6 aydır davam eləməsi “Əl-Əyn”in problemə etinasız yanaşması ilə əlaqədardır ki, böyük ehtimalla, qurum buna görə də ərəbləri sərt cəzalandıracaq.
SPORTİNFO.AZ
