"Keşlə" ölkə kubokunun 1/4 final mərhələsində "Qarabağ"a hər iki oyunda da məğlub olaraq (1-0, 6-0) mübarizəni dayandırdı.
Xüsusilə cavab görüşündəki darmadağın paytaxt klubunun baş məşqçisi Sənan Qurbanovu özündən çıxarmışdı.
Paltardəyişmə otağında əsəblərinə hakim ola bilməyən gənc məşqçi futbolçuları pul cəzası ilə hədələmişdi.
Bu isə keçən il qazanılan ölkə kubokuna görə almalı olduğu mükafatı hələ də almayan futbolçularda haqqlı narazılıq yaratmışdı. Onlar düşünür ki, mükafatı tələb edə bilməyən məşqçinin cərimə etmək haqqı da yoxdur.
Görünür, ağır məğlubiyyətdən sonrakı iki gündə Qurbanov da bunun fərqinə varıb. Ya da futbolçuların narazılığını kim(lər)sə ona çatdırıb.
Belə olmasaydı, o, bu gün keçirdiyi iclasda komandanı cəzalandırdığını açıqlayardı. Amma çalışdırıcı iclas boyu futbolçulardan olanları unutmağı və bütün fikirlərini qarşıdakı görüşlərə cəmləməyi dəfələrcə xahiş edib.
Futbolçuların onun sözünə nə qədər əhəmiyyət verib-vermədiyini isə növbəti matçlardakı nəticələrdən görə biləcəyik.
SPORTİNFO.AZ
