“Hazırda Zaqrebdə, ailəmin yanındayam, hələlik dincəlirəm.
Yaxın vaxtlarda yəqin ki, yeni iş yerimlə bağlı xəbər olar”.
Bu sözləri Sportinfo.az-a açıqlamasında millimizin sabiq çalışdırıcısı Robert Prosineçki deyib.
Təcrübəli mütəxəssislə əlaqə saxlamağımızda məqsəd Mahir Emrelinin “Dinamo”ya keçidi ilə bağlı fikirlərini öyrənmək idi.
Yığmamızın hücumçusunu Xorvatiyada nələr gözləyir? “Dinamo”da uğurlu ola bilərmi? Transfer xəbərini eşidəndə reaksiyası necə oldu?
Öz dilindən eşidək: “Yəqin ki, bilirsiz, mən Azərbaycanda işləyəndə Mahir gənc idi. İndiki qədər təcrübə sahibi deyildi.
Amma sonradan “Qarabağ”ın və millinin aparıcı futbolçularından birinə çevrildi. Hətta “Legiya” kimi komandada legioner həyatı yaşadı.
Düzü, indi hansı gücdə olduğunu dəqiq bilmirəm. “Dinamo” onu transfer edibsə, deməli, bildikləri nəsə var. “Dinamo” böyük klubdur, hər zaman diqqət mərkəzindədir. Ümid edirəm ki, Mahir burada uğurlu olmağı bacaracaq”.
Robert Prosineçki 2014-2017-ci illər aralığında Azərbaycan millisinin çalışdırıb.
Mahir Emreli əsas millidə məhz Prosineçkinin dönəmində - 2017-ci ilin martında, Qətərlə yoldaşlıq görüşündə debüt edib.
HƏBİB
