Bu gün AFFA-nın Lisenziya Komissiyasının iclası keçirilib.
İclasda 2021-2022-ci il mövsümündə UEFA-nın klub və Azərbaycan Premyer Liqası yarışlarında iştirak etmək üçün müraciət etmiş klubların sənədlərinə baxılıb.
AFFA-nın Lisenziya Komissiyası klubların lisenziyalaşdırılması üzrə qaydaların (Buraxılış 2020) 8-ci maddəsinə əsaslanmış müzakirələrdən sonra aşağıdakıları qərara alıb:
1. UEFA-nın klub yarışlarında iştirak etmək üçün aşağıdakı klublara lisenziya verilsin:
"Qarabağ" FK, "Neftçi" PFK, “Sumqayıt” FK, “Zirə” PFK, “Keşlə” FK, “Sabah” FK
2. Premyer Liqada iştirak etmək üçün aşağıdakı klublara lisenziya verilsin:
"Qəbələ" İK, “Səbail PFK
3. Premyer Liqa yarışlarında iştirak etmək üçün aşağıdakı klublara lisenziya verilməsin:
“Kəpəz” PFK, “Turan Tovuz” PFK, “Qaradağ-Lökbatan” FK, “Zaqatala” FK
Lisenziya iddiaçısı lisenziya ilə bağlı imtina barədə verilmiş bildiriş tarixindən etibarən 10 gün müddətində AFFA-nın Lisenziyalaşdırma üzrə Apellyasiya Komitəsinə apellyasiya şikayəti verə bilər.
“UEFA-nın klub yarışlarında iştirak etmək üçün Azərbaycan Futbol Klublarının Lisenziyalaşdırılması üzrə qaydaların (Buraxılış 2020) 13-cü maddəsinə müvafiq olaraq, 2021-2022-ci il mövsümündə UEFA-nın klub yarışlarında iştirak etmək üçün lisenziya almış klublar avtomatik olaraq eyni mövsüm üçün Azərbaycan Premyer Liqa yarışlarında iştirak etmək üçün lisenziya almış hesab olunur.
Sportinfo.az olaraq AFFA-nın Lisenziya Komissiyasının nə qərar çıxaracağını dünən öncədən xəbər vermişdik (https://www.sportinfo.az/idman_xeberleri/1_divizion/113484.html),
“Növbəti sezon Premyer Liqanın iştirakçı sayı – Diviziona xəbərdarlıq olundu” başlıqlı yazıda bildirmişdik ki, elitada iştirakçı sayının artmaması SOCAR-ın AFFA-ya əlavə maliyyə vəsaiti ayırmaması ilə əlaqədardır.
I Divizion təmsilçilərinə xəbərdarlıq olunub ki, yaranmış vəziyyətə publik narazılıq bildirməsinlər. Hansı klubun nümayəndələri və ya azarkeşləri federasiyanın əleyhinə mətbuata açılamalar versə, yeni sezondan etibarən onlara ayrılan maliyyə vəsaiti azaldılacaq.