«Neftçi»dən FİFA-ya şikayət olunub.
Bu barədə Sportinfo.az-a menecer Xanbaba Daşdı məlumat verib.
O, cari ilin əvvəlində paytaxt klubu ilə müqavilə imzalayan Saman Nəriman Cahanın transferinə görə beynəlxalq quruma müraciət etdiyini bildirib. Belə ki, iranlı yarımmüdafiəçi «ağ-qaralar»a onun tərəfindən təklif olunsa da, qarşı tərəf son anda başqa şəxsləri vasitəçi «tutaraq», keçidi rəsmiləşdirib.
X.Daşdını dinləyək: «Bilirsiz ki, mən bu məsələ ilə əlaqədar AFFA-ya müraciət etmişdim. Nəhayət, İntizam Komitəsindən resmi cavab gəldi. Bu işin onlara aid olmadığını bildirdilər.
Mən də vaxt itirmədən bu barədə hüquqşünaslara məlumat verdim. Çünki AFFA-nın Oyunçuların Transferi və Statusu komitəsi İntizam Komitəsinə yönləndirmə eləmişdi ki, məsələyə siz baxmalısız, sonda belə bir cavab gəldi. Özü də 3 aydan sonra.
İndi isə məcburiyyət qarşısında qalıb, FİFA-ya məktub göndərmişəm. Futbolçunun adından klublarla danışmaq hüququmun olduğunu təsdiqləyən, o cümlədən, başqa faktları təqdim eləmişəm».