Çempionluq uğrunda mübarizə aparmaq istəyən «Neftçi» bir-birinin ardınca transfer «bomba»larının fitilini çəkməkdədir.
Rusiyalı vinger Rezuan Mirzovla 1 illik müqavilə imzalayan bakılıların yeni hücumçu ilə anlaşdığını da xəbər vermişik.
Bu, son deyil! «Ağ-qaralar»ın funksionerləri hazırda Rumıniyadadır və adıçəkilən ölkənin iddialı klublarından birinin forvardının keçidini rəsmiləşdirməyə çalışır.
Azərbaycanda «transfer pəncərəsi» dünən bağlanıb. İşini ehtiyatlı tutan idarəçilər hər ehtimala qarşı onun adını Peşəkar Futbol Liqasına göndərilən iştirak ərizəsinə daxil edib.
«Neftçi» futbolçu ilə şəxsi müqavilə şərtlərində ortaq məxrəcə gəlib.
Redaksiyamıza verilən məlumata görə, transferin bu dəqiqəyə kimi açıqlanmamasının yeganə səbəbi iki klub arasında danışıqların sona çatmamasıdır.
Rumıniya təmsilçisi 450 min avronun üstündə təzminat istəyir, «Neftçi» isə bu rəqəmi yarıbayarı aşağı salmağa səy göstərir.
«Ağ-qaralar» bu yay Emil Balayev, Filip Ozobiç, Adrian Mutu (baş məşqçi), Yuri Matias, Mark Tamaşa, Qara Qarayev, Ervin Koffi, Andre Sinyaşiki, Aaron Samuel Olanare, Dieqo Valdez və Rezuan Mirzovu da transfer edib.
SPORTİNFO.AZ
