“Arsenal”ın sabiq baş məşqçisi Arsen Venger “Bavariya”nın futbolçusu Sere Qnabri barədə danışıb.
Sportinfo.az xəbər verir ki, Qnabri 2012-2015-ci illərdə “Arsenal”da çıxış edib. Venger bildirib ki, futbolçunun “Arsenal”la müqaviləni uzatmasına “Bavariya” mane olub:
“O, həmişə istedadı ilə fərqlənib. Ancaq karyerasının müəyyən dönəmində özünəinamı çatışmırdı. Həmişə düşünürdük ki, uzun müddət kluba yüksək səviyyədə xidmət edə biləcək futbolçu var.
Sonra Qnabri “Vest Bromviç”dəki uğursuz icarə dönəmindən qayıtdı. Yenə də özünəinamı çatışmırdı. Mən bütün qüvvəmlə ona kömək etməyə çalışırdım.
Onunla müqaviləni uzatmaq üçün uzun müddət danışıq apardıq. Ancaq “Bavariya” bu məsələdə manipulyasiya etmişdi. O, futbolçunu inandırmışdı ki, “Verder”ə keçsə, qısa müddətdən sonra “Bavariya”da olacaq”.
