Bir qədər öncə xəbər verdiyimiz kimi, «Kəpəz» baş məşqçi problemini həll edib.
Azər Bağırov 4 aylıq aradan sonra sükan arxasına gətirilib.
Artıq onunla anlaşmanın detalları da redaksiyamıza məlumdur.
Gəncə publikasının rəğbət bəslədiyi mütəxəssislə müqavilənin müddəti mövsümün sonunadək qüvvədə qalacaq. «Sarı-göylər» Premyer Liqada yerini qoruyarsa, kontrakt avtomatik olaraq daha 2 il uzadılacaq.
Gəncə təmsilçisi çempionatın gerid qalan altı turunda məğlubiyyətlə üzləşib. Yarışın xal qazanmayan yeganə iştirakçısı hazırda turnir cədvəlinin sonuncu pilləsində qərarlaşıb.
Adil Şükürov «Qəbələ»yə 0:3 hesablı yenilgidən sonra istefaya gedib. İyunda 2+1 illik müqaviləyə imza atmış mütəxəssislə kontrakta qarşılıqlı razılıq əsasında xitam verilib.
Azər Bağırov 2024-cü ilin sentyabrında baş məşqçi postunda məhz Adil Şükürovu əvəzləmişdi. «Sarı-göylər»i Premyer Liqada saxlaması istənilmiş, o da bu vəzifənin öhdəsindən gəlmişdi.
Fəqət, klubun yeni rəhbərliyi onunla yola davam etmək istəmədi, iyunda əməkdaşlığı dayandırdılar. Ötən müddət göstərdi ki, bu, səhv qərar olub. Və bu gün ziyanın yarısından qayıdıblar.
SPORTİNFO.AZ
.jpg)
