“Azərbaycan çox güclü rəqibdi. Biz isə indiyə qədər bu mərhələyə yüksəlməmişik. İlk dəfədir əsas mərhələdə çıxış edirik” - Sportinfo.az-ın məlumatına görə, bu sözləri futzal üzrə Albaniya millisinin baş məşqçisi Erind Resuli deyib.
AÇ-2018-in seçmə mərhələsində millimizlə qarşılaşan albanlar 0:5 hesablı məğlubiyyətə üzülüblər. Görüş başa çatdıqdan sonra matç haqqında fikirlərini bölüşən Resuli bunları deyib: “Oyuna gəldikdə, birinci hissədə bərabərsəviyyəli qarşılaşma izlədik. Bir səhv etdik və Azərbaycan millisi bundan faydalandı.
Bizim isə azı 2 real qol şansımız oldu. Komandamın fasiləyə qədər daha yaxşı oynadığını düşünürəm. Bu sözləri ikinci hissə haqda deyə bilmərəm. 2-3 ciddi səhv buraxdıq. Hesab 3:0 olduqdan sonra bizim üçün hər şeyin bitdiyi aydınlaşdı.
Qələbə münasibəti ilə komandanızı təbrik edirəm. Xüsusilə də qapıçınız çox yaxşı oynadı, ən azı 3-4 epizodda vacib reaksiya nümayiş etdirdi və qol vurmağımıza imkan vermədi. Fikrimcə, Azərbaycan millisi qrupun ən güclüsüdür. Komandanız kifayət qədər təcrübəli və səviyyəli futzalçılardan qurulub”.
